مشكلتي .. بطيبتي وصفاء نيتي ؟؟ ساعدوني !! -_-

بسم الله الرحمن الرحيم

السلام عليكم ورحمة الله وبركاته

ما أريد أطول الموضوع عليكم
راح أدخل للموضوع بشكل مباشر ..
أني دائما ً ومن أني زغيرة وماما تكلي أني أخاف عليج من طيبتج
وأني أضحك وأكول لماما ليش الطيبة عيب ؟ لو حرام ؟
هاي طبيعتي وما أكدر اغيرها ..
مشكلتي أثق بأي أنسان وما عندي قدرة أعرف نيته الخبيثة وياي ..
وهذا الشي ديأذيني حيييييييييل
حتى أني أكثر من مرة أثق بناس هواية وأحجيلهم كل الي أمر بي بس للأسف
أنخدع بيهم بالأخر ..
وأحاول أغير من طبعي أكون نبه أكثر بس ما أكدر أغير طبيعتي
مشكلتي أتعاطف وي أي شخص يمكن يحاول يستغل طيبتي بغير أشياء ؟؟

ساعدوني ترى مدا أتحمل هاي الناس الي عايشه بنصها ..

تحياتي

هلا حبيبة قلبي ..

لا تحتارين ولا شي ..

آني متأكدة انج رح تتخطين هالأزمـة الدتمرين بيها ..

ممكن بنظـر الناس متوصـل لدرجة " التأزم " بس أكيد هيا مسببة الج قلق وهاجس وخـوف ..

وهذا الشي من حقــج ..

حبيبتي //

الناس شكثر ماتنطيهم مايثمـر بيهم ،، أقرب مثال عندج الوالدين لو يشعلون أصابع ايديهم العشرة شمع لابنائهم يظلون بعيون الابناء " مقصـرين " والآباء الثانين أحسن من عدهم ..

فما بالج بمجتمع انتي تتداخلين وياه وماتربطج وياهم علاقة سـوى " المصلحة " في الغالب ..

لو تبحثين عن صديقة صدوقة //

نصيحتي لج سوي " ستووب " للبحث ،، اوقفيه نهائياً ..

لأن الصداقة عمرها ماتجي بهالطريقة ..

الصديق اللي يسـأل عنج بغيابج ، ويوكف وياج بمحنتج ، ومايحتمل يشوف دمعتج ..

الصديق هو اللي تهمه كل تفاصيل حياتج ، هو اللي ينطي وماينطر الأخذ منج ..

وهذا الانســان ممكن يكون حولج وقريب منج بس انتي ممنتبهه ، وممكن تكتشفين مدى حب هالانسان من خلال موقف يمر عليج ويساندج بيه هذا الشخص ..

أهـم شيء لازم تسوينه //

1ـ تكوني صديقة لنفسج ، لأن لو صادقتي نفسج رح تفهميها ، ويقل شعورج بالوحـدة .

...

يمكـن آني جنت مثلج ماعرف منو الصادق من الجاذب ..

بس من التجارب اللي مريت بيها اكتسبت خبرة بالتعامل مع النـاس ..

2ـ ابعدي عن العلاقات السريعة بقدر الامكان ، لأن مستحيل بين يوم وليلة تكتشفين صديق أو شخص يحبج فجأة بخلال جم ساعة ..

وأهـم شيء ..

3ـ لاتنطرين من أحـد شيء ، لا أحد يسأل عنج بغيابج ، ولا يواسيج بحزنج ..

لأنج رح تنصدمين من النتائج ..

4ـ ولاتيئسين من التغيير .. وتكولين اني طيبه وعلى نياتي ومستحيل اتغير ..

بالعكس ، لو خليتي ببالج قناعة ان " اني تغيرت " وصرت " اكثر حذر " و " حصرت علاقاتي " صدكيني رح تتقنين الدور ، وبعد فترة رح تعيشينه بكل تفاصيله .. وآني أكبر مثال كدامج .. رغم اني ماحب أحجي عن نفسي لكن كل اللي كتبته الج عن " تجربة عشتها " ..

وأكيـد " العمـر " يلعب دور بهذا الشيء .. لأن الانسان ينتقل من مرحلة الطفولة البريئة إلى مرحلة الشباب والمراهقة ،، ويدخل عالم مايعرف عنه شيء ،، فبالتالي يتعرض للكثير من هذي الضغوط النفسية ،، وصدكيني بعد جم سنة رح تشوفين نفسج تغيرتي للأفضـــل ..

وآني والله ماعلمني " طريقة التعامل مع الناس " غير هذا المنتدى ..

لأن شفت بيه العجايـــب ..

آسفة على الاطالة .. بس والله حابه اساعدج .. وأتمنى ظروفج النفسية تتحسن بأقرب وقت ..

ولاتنسين .. أختج دائماً يمج ..

إلى لقــاء قريب ان شـاء الله ..

محبتي ~

شكرا ً الج حبيبتي الغالية سارة .. يشرفني أن أكون أخت وصديقة الج ..

كلامج كله صحيح وموزون .. ياريت لو كل البشر بطيبتج ..

تحياتي الج وشكراً للمساعدة يا طيبة

العفو حبيبتي هذا واجب